ছাত্ৰ - ছাত্ৰী কেনেদৰে পঢ়া উচিত। কি দৰে পঢ়িলে ভাল নম্বৰ পাব। এনেধৰনে পঢ়িলে ৯০% পাব।

 ছাত্ৰ - ছাত্ৰী কেনেদৰে পঢ়া উচিত। কি দৰে পঢ়িলে ভাল নম্বৰ পাব। এনেধৰনে পঢ়িলে ৯০% পাব।

পৰীক্ষাত নাম্বাৰ ভাল পাবলৈ দিন-ৰাতি একাকাৰ কৰাৰ দৰকাৰ নাই, মাথোঁ সলনি কৰক পঢ়াৰ ধৰণ!

আজি কালিৰ দিনত কেৱল কিতাপৰ পোক হ’লেই নহ’ব। বহুত ছাত্ৰ-ছাত্ৰীক দেখা যায় যিয়ে দিনটোত ১০-১২ ঘণ্টা কিতাপ মেলি বহি থাকে, কিন্তু পৰীক্ষাৰ সময়ত সকলো পাহৰি যায়। ইয়াৰ বিপৰীতে কিছুমানে খেল-ধেমালি কৰিও ধুনীয়া ৰিজাল্ট কৰে। ইয়াৰ গোপন ৰহস্য হ’ল "স্মাৰ্ট ৱৰ্ক"।

আহকচোন জানো আমাৰ পঢ়াৰ টেবুলত কি কি সৰু সৰু পৰিৱৰ্তন আনি আমি পঢ়াখিনি মগজুত চিৰস্থায়ী কৰিব পাৰোঁ:

১. 'ভাটৌ পঢ়া' নহয়, চকু মুদি মনত পেলোৱাৰ অভ্যাস কৰক (Active Recall)

আমি সাধাৰণতে কি কৰোঁ? এটা উত্তৰ বাৰে বাৰে পঢ়ি থাকোঁ। ইয়াৰ দ্বাৰা মগজুৱে ভাবে যে মই এইটো জানো, কিন্তু আচলতে পৰীক্ষাৰ হলত কলমটো নচলা হয়।

কি কৰিব: এবাৰ পঢ়া শেষ হ’লে কিতাপখন জোৰকৈ জপাই থওক। এতিয়া এখন খালী কাগজ লৈ মনত পেলাবলৈ চেষ্টা কৰক আপুনি কি পঢ়িলে। যিখিনি পইণ্ট পাহৰিছে, সেইখিনিহে আকৌ চাব। ইয়াৰ ফলত মগজুৰ ব্যায়াম হয় আৰু কথাটো পাহৰা টান হৈ পৰে।

২. মগজুক 'ব্ৰেক' দি দি পঢ়ক (Pomodoro Technique)

আমাৰ মগজুৱে এটা নিৰ্দিষ্ট সময়ৰ পিছত আমনি পায়। বহু সময় ধৰি একেৰাহে পঢ়িলে মগজুৱে নতুন তথ্য ল’ব নোৱাৰে।

কি কৰিব: ঘড়ী চাই ২৫ মিনিট সম্পূৰ্ণ জোৰেৰে পঢ়ক। সেইখিনি সময়ত মোবাইল বা টিভিৰ কথা নাভাবিব। ২৫ মিনিট হ’লেই ৫ মিনিটৰ এটা বিৰতি লওক। অলপ পানী খাওক বা চকু দুটা জপাই জিৰণি লওক। এনেকৈ পঢ়িলে আপুনি ভাগৰি নপৰে।

৩. আনে বুজাকৈ ক’ব পাৰিছে নে নাই চাওক (Feynman Technique)

আপুনি এটা বিষয় সঁচাকৈ বুজি পাইছে নে নাই, সেয়া জানিবলৈ এটা সহজ উপায় আছে।

কি কৰিব: ধৰি লওক আপোনাৰ সৰু ভাই-ভনী এজনক আপুনি সেই বিষয়টো বুজাব লাগে। যদি আপুনি কোনো গধুৰ শব্দ ব্যৱহাৰ নকৰাকৈ সহজকৈ বিষয়টো বুজাব পাৰিছে, তেন্তে বুজিব যে আপোনাৰ পঢ়া সার্থক হৈছে। যদি ক’ৰবাত খোকোজা লাগে, তাৰমানে সেইখিনি ঠাই আপুনি আকৌ পঢ়িব লাগিব।

৪. পাহৰি যোৱাৰ আগতেই পুনৰাবৃত্তি কৰক (Spaced Repetition)

নতুনকৈ পঢ়া কথা এটা ২৪ ঘণ্টাৰ ভিতৰত আমি প্ৰায় ৮০% পাহৰি যাওঁ। সেয়ে ক্ৰামিং (cramming) বা পৰীক্ষাৰ আগদিনা সকলো পঢ়িম বুলি ভবাটো ভুল।

কি কৰিব: আজি যিটো পঢ়িলে, সেইটো কাইলৈ পুৱা ৫ মিনিটৰ বাবে হ’লেও চকু ফুৰাব। তাৰ পিছত এসপ্তাহৰ মূৰত আৰু মাহটোৰ শেষত এবাৰ চাব। এনে কৰিলে পৰীক্ষাৰ সময়ত আপুনি কোনো টেনচন নোহোৱাকৈ উত্তৰবোৰ লিখিব পাৰিব।